समाधियाँ दे परदेस च

  किछ है ताँ नीं? 'वीरपुर'  पोंह्ची करी मैं अपणी यूनिट देयां जुआनां नै जाई मिल्लेया था।  तित्थू बैरक दे इक कमरे च असां दे सिर्फ 3-4 जुआन ही थे। तिन्हां ते इक जुआन मिंजो तांईं चाह् लई आया था।  जुलाई महीने च भी ठंड बझोआ दी थी। कुत्थू सैह् असम दी गर्मी कनै कुत्थू अरुणाचल प्रदेश दी ठंड।  थोड़िया कि देरा च मता किछ बदळोई गिया था।  खैर तिसा चाह्ई दा बड़ा मजा आया था।  फौजियां जो इक दूजे दा मितर बणदेयां देर नीं लगदी है।  सैह् इक जुट होई इक्की टब्बरे सांहीं रैंह्दे हन कनै तिन्हां च इक्क-दूजे दे सुख-दुख च हिस्सेदार बणने दी चाहत होरना ते सुआई होंदी है।  मिंजो इसा गल्ला दा पैह्लें ही पता था कि मेरी नौंईं यूनिट खालिस अहीर जात दी तोपखाना यूनिट थी।  मैं अहीरां कन्नै पहलें भी रही चुक्केह्या था। सन् 1976 च मिलिट्री बेसिक ट्रेनिंग पूरी होणे पर मेरी पहली पोस्टिंग तोपखाने दी इक मीडियम रेजिमेंट च होई थी जिसदी पहली बैटरी अहीरां दी, दूजी बैटरी राजपूतां  दी कनै तीजी बैटरी सिक्खां दी थी।  मैं अहीर बैटरी कन्नै रिहा था।  अहीर ज्याद...