10. मिंजो शर्मिंदा मत करदा

मिंजो शर्मिंदा मत करदा

जिंञा कि मैं इसा गल्ला दा ज़िकर पहलैं भी कित्तेह्या कि इक दो बरी देह मौके भी आए थे जाह्लू मेरा दिल फ़ौज दी नौकरी छडणे जो कित्ता था।  पहली बरी फ़ौज छडणे दा वचार मेरे दमाके च बेसिक मिलिट्री ट्रेनिंग दे टैमें आया था।

मैं जुलाई सन् 1975 च बेसिक मिलिट्री ट्रेनिंग तांईं आर्टिलरी ट्रेनिंग सेन्टर हैदराबाद गिया था।  ट्रेनिंग दे दौरान असां जो इक दिन फैरिंग दा भ्यास करुआया जा दा था।  हथियार था—कार्बाइन मसीन 9 एमएम।  मुठभेड़ दिया लड़ाइया तांईं एह् बड़ा कारगर हथियार होंदा था।  इक नायक रैंक दे उस्ताद दी देखरेख च फैरिंग होआ दी थी। तकरीबन सौ गज पिच्छें इक जेसीओ भी बैठेयो थे।  खब्बा पैर अग्गें कनै सज्जा पैर पिच्छें रखी करी हथियारे जो लक्के कन्नै लाई नै थोड़ी कि दूर लग्गेह्यो टारगेटां पर गोळियां चल्ला दियां थियां। हर रंगरूट दे साह्म्णे तिन्न-तिन्न टारगेट लग्गेह्यो थे। पहले टारगेटे पर गोळी चलाणे दे परंत अगला पैर टकाई करी रखदे होयां पिच्छले पैरे कन्नै हरकत करनी थी कनै अगले टारगेटे गास नसाणा लई करी गोळी चलाणी थी।  मैं सिक्खायो तरीके कन्नै गोळियां चला दा था पर पता नीं उस्ताद होरां जो मेरे फैर करने दे तरीके च क्या नुक्स नज़र आया कि तिन्हां लकड़ी दे इक निक्के देहे पर पैनें पॉइंटरे कन्ने मेरिया तुंबिया पर हुचका मारी दित्ता।  मैं पीड़ा कन्नै तिलमिलाई गिया था।  मैं गुस्से च आई करी अपणे हथियार दी मैगजीन च बाकी बचियां तिन्नों गोळियां जो उस्ताद दिया छातिया च तुआरी देणे दी सोची लई थी।  तिस तांईं मैं अपणे हथियारे दे चेंज लीवर जो 'आर' ते 'ए' पर खसकाई दित्ता था मतलब तिस दे परंत बाकी तिन्नों गोळियां इक बर्स्ट दे तौर पर इक सार निकळनियां थियां। 

 

साइद उस्ताद होरां मेरे चेहरे दे भाओ पढ़ी लै थे। सैह् फोरन मेरिया पिट्ठी पिच्छें होई गै कनै तिन्हां मिंजो 'भूमि शस्त्र' दा ऑर्डर देई ता मतलब मिंजो हथियार थल्लैं जमीना पर रखी देणा था।  मेरी किस्मत खरी थी कि मैं तिन्हां दा ऑर्डर मन्नी लिया था कनै हथियार जो जमीना पर रखणे ते पहलैं हथियार दे चेंज लीवर जो 'ए' ते 'एस'  मतलब 'स्टॉप' पर करी दित्ता था। तिन्हां मिंजो सजा दे तौर पर हत्थ उप्पर करी नै पूरे मैदाने दे दस चक्कर लगाणे दा ऑर्डर दित्ता। चंद सकिंटां च घटियो इसा घटणा दी मेरे साथी रंगरूटां जो होआ तिकर नीं लग्गी थी।

जेकर तिहाड़ी तैस च आई करी मैं तिस उस्तादे जो गोळी मारी दित्तिह्यो होंदी तां मेरी जिंदगी इक नरक बणी गइयो होंदी।  मैं इक सानदार जिंदगी जीणे ते महरूम रही जांदा।

तिन्हां दिनां च फ़ौज दे उस्तादां दा रंगरूटां पर हत्थ ठुआणा इक आम गल्ल होंदी थी।  अपणी ट्रेनिंग पूरी करी नै यूनिट च जाणे दे परंत मिंजो पता लगेया कि कुसी रंगरूटे पर जुल्म ढाणे दिया बजह ते तिस उस्तादे दा कोर्ट मार्शल होया था कनै तिसजो फ़ौज ते बरखास्त करी दित्ता गिया था।

तिस बग्त फ़ौज च भर्ती होई करी नै फिरी छुटकारा पाणा तकरीबन नामुमकिन था।  इस करी नै मेरे मने च फ़ौज ते भगौड़ा होणे दा ख्याल आया था पर फ़ौज च भर्ती होणे दे टैमे भर्ती अफसर दी दित्तिह्यो सलाहें मिंजो भगौड़ा होणे ते बचाई लिया था।

दरअसल फ़ौज च मेरा भर्ती होणा आम आदमी ते थोड़ा हटी नै, लग्ग देहा था।  सन् 1975 दे मार्च महीनें दा खीरी हप्ता था।  मैं धर्मशाला ते घरे जो औआ दा था।  पालमपुरे दे पराणे बस अड्डे पर उतरी करी मैं भर्ती अफसर कन्नै मिलणे तांईं सिद्धा ब्रांच रिक्रूटिंग ऑफिस गिया।  तिस बग्त भर्ती दफ्तर घुग्गर दे नाळे पर बणिह्यो पुळिया ते जरा की उपरले पासें था।  भर्ती दफ्तर दे गेटे पर खड़ोतेयो संतरियें मिंजो अन्दर नीं जाणा दित्ता। मेरियां मिन्नतां दा तिस पर कोई असर नीं होया।  निरास होई करी मैं घरे तांईं बस पकड़ी लई।  मैं संघोल खड्ड च बस ते उतरी करी अपणे घर (चम्बी) जाणे दे बजाय सिद्धा संघोल पोस्ट ऑफिस जाई रिहा। तित्थू इक पोस्टकार्ड खरीदी करी तिस पर ब्रांच रिक्रूटिंग ऑफिसर, पालमपुर दे नाँयें इक दरखास्त लिखी करी मैं लैटर बॉक्से च पाई आया।  आठ-नौ  दिनां परंत मिंजो भर्ती अफसर लेफ्टिनेंट कर्नल जी. ए. डेविड होरां दा इक पोस्टकार्ड मिल्लेया।  तिन्हां मिंजो पालमपुर आई नै मिलणे तांईं लिक्खेह्या था। भर्ती दफ्तर दे अंदर जांदे टैमें मैं सैह् पोस्टकार्ड अपणे हत्थें पकड़ी रक्खेह्या था। गेटे पर खड़ोतेयो संतरियें पोस्टकार्डे पर लग्गिह्यो भर्ती अफसर दी मोहर दिक्खी नै मिंजो अंदर जाणा दित्ता।

भर्ती अफसर दे दफ्तर दे दरबाजे च खड़ोई करी, ''मे आई कम इन, सर'' बोली नै मैं अन्दर जाणे दी इजाज़त मंगी। अन्दर ते इक भारी रौबदार उआज सुणोह्यी थी, ''वेट''।  किछ देर निहाळणे दे परंत मैं फिरी अन्दर जाणे दी इजाज़त मंगी। तिसा बारिया मिंजो इजाज़त मिली गई। फ़ौजी बर्दिया च सज्जेयो लेफ्टिनेंट कर्नल जी.ए. डेविड होरां बड़े ध्यानें कन्नै मिंजो अन्दर ओंदे जो दिक्खा दे थे।  मैं अपणे हत्थे च पकड़ेह्या सैह् पोस्टकार्ड तिन्हां साह्म्णे मेजे पर रखी दित्ता।  तिस पोस्टकार्डे पर इक नज़र मारी करी तिन्हां मिंजो ते पुच्छेया, "मुझ से क्या चाहते हो?'' ("मिंजो ते क्या चांह्दे?")

''सर, मैं आर्मी में जाना चाहता हूँ।''

("सर, मैं आर्मी च जाणा चांह्दा।")

''देखो, मैं तुम्हें दो तरीके से एनरोल कर सकता हूँ―एक आर्मी एजुकेशन कोर में हवलदार और दूसरा आर्मी में सिपाही क्लर्क के तौर पर। बताओ तुम्हें कहाँ जाना है?''

("दिक्ख, मैं तिज्जो दो तरीकेयां नै एनरोल करी सकदा—इक आर्मी एजुकेशन कोर च हौळदार कनै दूजा आर्मी च सिपाही क्लर्क दे तौर पर। दस तिज्जो कैस च जाणा है?")

''सर, आप मुझे इन दोनों में से पहले क्या बना सकते हो?'' ("सर, तुसां मिंजो इन्हां दूंहीं च पहलैं क्या बणाई सकदे?")  मैं बड़िया नरमियां कन्नै पुच्छेया था।

'अभी तो मैं तुम्हें क्लर्क बना सकता हूँ। एजुकेशन हवलदार बनने के लिए तीन महीने बाद जुलाई में आना पड़ेगा।'

("इस बग्त तां मैं तिज्जो क्लर्क बणाई सकदा। एजुकेशन हौळदार बणने तांईं तिन्न महीने परंत जुलाई च औणा पौणा।")

मैं तिस बग्त सोच्चेया कि जुलाई महीनें मिंजो कुन्नी भर्ती दफ्तर दे अन्दर औणा देणा  है कनै क्या पता कर्नल साहब तिस बग्त तित्थू होणे भी कि नीं होणे। इस करी नै मैं तरंत जवाब दित्ता था, "सर, मुझे क्लर्क बनना है"। ("सर, मिंजो क्लर्क बणना है।")

'ओके, कपड़े उतारो और बाहर लगी उस लाइन में लग जाओ।'

("ओके, कपड़े उतार कनै बाहर लगियो उसा लैणी च खड़ोई जाह्।")

तिन्हां दे दफ्तर दे बरैंडे कन्नै भर्ती मीदवारां दी इक लम्मी जेही लैण सुज्झा दी थी।  मैं कपड़े तुआरी करी कच्छे च सब्भते पच्हां जाई नै खड़ोई गिया।  मैं तिस बग्त पतळिंह्गू देहा था।  मिंजो अग्गें पहलवाणा सांह्ईं मोटे-तगड़े मुंडू खड़ोतेयो थे।  मैं सोचा दा था कास मैं भी तिन्हां सांह्ईं हुंदा।  भर्ती अफ़सर दे दफ्तर दे दरवाजे दे ठीक साह्म्णे बरैंडे दिया कड़िया नै बजन तोलणे वाळी मसीन टंगोइयो थी। इक-इक करी नै मीदवार तिसा कन्नै लटकोआ दे थे।  सूबेदार मेजर साहब मसीन दे कांटे जो बड़िया गौरा नै दिक्खा दे थे।  फिरी सैह् मीदवार दिया छातिया जो बिन फुलाए कनै  फुलाणे ते बाद फीते कन्नै नापा दे थे।  तिस ते परंत सैह् चाका कन्नै मीदवार दिया छातिया पर 'फिट'  जां 'अणफिट' दा  नसाण लगा दे थे।

जाह्लू लैणी च मिंजो गांह् तिन-चार मुंडू रही गै ताह्लू लेफ्टिनेंट कर्नल साहब अप्पू बाहर निकळी करी मीदवारां दा नाप-तोल करना लगी पै। मेरे अग्गे दे सारेयां मुंडुआं छड्डी तिन्हां मेरिया छातिया पर ही 'फिट' दा नसाण लगाया था। तिस ते परंत सैह् अन्दर जाई नै अपणिया कुर्सिया च बैठी गै थे कनै सूबेदार मेजर साहब होरां फिरी अपणा कम्म संभाळी लिया था।

मैं, किछ देरा परंत, तिसा ही हालता च, तिन्हां दे दफ्तर च जाई नै तिन्हां ते पुच्छेया था कि तिस ते अग्गें मिंजो क्या करना है।  तिन्हां अपणे साह्म्णे बैठेयो इक कैप्टन साहब होरां बक्खी इसारा करी नै मिंजो ग्लाया, ''अब डॉक्टर साहब आपका मेडिकल चेकअप करेंगे।  सामने दाईं तरफ इनका ऑफिस है वहां जाकर बाहर खड़े हो जाओ।'' ("हुण डाक्टर साहण होरां तुसां दा मेडिकल चेकअप करना है। साह्म्णे सज्जे पासें इन्हां दा दफ्तर है ओत्थू जाई नै बाहर खड़ोई जा।")  थोड़ी कि देरा बाद डॉक्टर साहब होरां आई नै मेरा मेडिकल चेकअप करी के मिंजो फ़ौज तांईं 'फिट' लिक्खी दित्ता था।

मैं पूरे कपड़े पहनी करी कर्नल साहब होरां कन्नै फिरी मिल्लेया कनै अगली करवाई दे बारे च पुच्छेया। तिन्हां मिंजो दस्सेया कि अगले सोमवारे जो लिक्खुऐं मतिहान होणा है।  तिस मतिहाने च तिस बग्ते दिया दसमीं जमाती दे सिलेबसे दे मुताबिक अंग्रेजिया दा पर्चा दो घंटे च लिखणा था। तिन्हां मिंजो एह् गल्ल भी साफ करी दित्ती थी कि तिस मतिहाने च तिन्हां मेरी कोई मदत नीं करनी है।

तय कित्ते दिनैं 28 मीदवार मतिहान देणा बैठे। सारेयां जमीना पर लैणी च बैठी करी नै मतिहान दित्ता।  कर्नल साहब होरां तित्थू इक चक्कर मारेया।  सैह् बड़ी देर तिकर मेरे बक्खें खड़ोई नै मिंजो पर्चा लिक्खदेयो दिक्खदे रैह् थे। 

मतिहान खत्म होणे दे परंत सारे मीदवार अपणे-अपणे घरां जो जाणे तांईं तियार खड़ोतेह्यो थे। तिस बग्त कर्नल डेविड साहब होरां अपणा अर्दली भेजी करी मिंजो अपणे दफ्तर सद्दी करी पुच्छेया, "कैसा हुआ तुम्हारा पेपर?" (कदेहा होया तेरा पर्चा?) "सर, अठाइस कैंडिडेट्स में अगर एक भी पास हुआ तो वो मैं हूँगा।" ("सर, ठाइयां मीदवारां ते जेकर इक भी पास होया तां सैह् मैं होणा है।") कर्नल साहब होरां मुस्कराई नै ग्लाया था, "अब जाओ और रिजल्ट का इंतज़ार करो।" ("हुण जा कनै रिजल्ट दी निहाळ कर।")

जाह्लू मिंजो तकरीबन तिन्न महीने तिकर कोई खबर नीं मिल्ली तां मैं पता करने तांईं भर्ती दफ्तर पालमपुर गिया पर मिंजो अन्दर जाणा नीं दित्ता गिया। दिन बीतदे गै।  खीर च जुलाई महीने दे पैह्ले हफ्तें मिंजो इक तार मिल्ली जिस च पास होई जाणे कनै 14 जुलाई जो ऑरिजिनल सर्टिफिकेटां कन्नै भर्ती दफ्तर च रपोट करने तांईं बुलावा था।  तिस मतिहाने च सिर्फ दो ही मुंडू पास होयो थे जिन्हां च इक मैं था।  मिंजो तोपखाना ट्रेनिंग सेन्टर हैदराबाद जाणा था।  राहदारी कनै रेलवे वारंट लई नै मिंजो कर्नल साहब होरां नै मिलणे तांईं भेजेया गिया। तिन्हां मिंजो फ़ौज दी पहली तनखाह दे तौर पर 20 रुपइए दिंदिया बारिया ग्लाया था, "बेटा मैंने तुम्हें भर्ती तो कर लिया है पर तुम कभी फ़ौज से भगौड़ा हो कर मुझे शर्मिंदा मत करना।" ("बेटे मैं तिज्जो भर्ती तां करी लिया पर दिक्खेयां कदी फ़ौज ते भगौड़ा होई नै मिंजो शर्मिंदा मत करदा।"

लेफ्टिनेंट कर्नल जी.ए. डेविड साहब होरां दी तिस हिदायत पर मैं म्हेसा अमल करदा रिहा।

— भगत राम मंडोत्